ಸಮನ್ವಯ ಶಿಕ್ಷಣವನ್ನು ಪರಿಣಾಮಕಾರಿಯಾಗಿ ನೀಡುವ ವೈಜ್ಞಾನಿಕ ಪದ್ದತಿಯನ್ನು ರೂಪಿಸಬೇಕು – ಮೌಲಾನ ಶಾಫಿ ಸಹದಿ

0
229

ಬೀದರ್ : ಮುಸ್ಲಿಂ ಸಮುದಾಯದ ಶೈಕ್ಷಣಿಕ ಅಭಿವೃದ್ದಿಗೆ ವೈಜ್ಞಾನಿಕ ಪದ್ದತಿ ಮತ್ತು ರಚನಾತ್ಮಕ ಕಾರ್ಯ ಯೋಜನೆಗಳನ್ನು ರೂಪಿಸಲು ಪಣತೊಟ್ಟು ದುಡಿಯಬೇಕು ಎಂದು ಕರ್ನಾಟಕ ರಾಜ್ಯ ವಕ್ಪ್ ಬೋರ್ಡ್ ಅಧ್ಯಕ್ಷರಾದ ಮೌಲಾನ ಶಾಫಿ ಸಹದಿ ಬೀದರ್ ನಲ್ಲಿ ನಡೆದ ರಾಷ್ಟ್ರೀಯ ಶೈಕ್ಷಣಿಕ ಸಮ್ಮೇಳನದಲ್ಲಿ ದೇಶದ ಶಿಕ್ಷಣ ತಜ್ಞರನ್ನು ಉದ್ದೇಶಿಸಿ ಹೇಳಿದರು.

ಶಾಹೀನ್ ಆಯೋಜಿಸಿದ ಸೆಮಿನಾರ್ ನಲ್ಲಿ ಮಾತನಾಡಿದ ಅವರು, ಹಳೆಯ ಪದ್ದತಿ ಮತ್ತು ಮಾದರಿಯು ಆಧುನೀಕರಣವಾಗಬೇಕು. ಈಗಿನ ಸ್ಥಿತಿಯಲ್ಲಿ ನಾವು ಸಮಸ್ಯೆಗಳೇ ತುಂಬಿರುವ ಶಿಕ್ಷಣ ಸಂಸ್ಥೆಯಿಂದ ಹೊರ ಬಂದ ಲಕ್ಷಾಂತರ ಯುವ ಸಮೂಹವನ್ನು ಸರಿಪಡಿಸಲು ಸಮಯ – ಹಣ ಮತ್ತು ಜ್ಞಾನ ಬಳಸುತ್ತಿದ್ದೇವೆ. ನಾವು ಸರಿಯಾದ ರೀತಿಯಲ್ಲಿ ಶಿಕ್ಷಣ ಮತ್ತು ಜ್ಞಾನ ನೀಡಿದರೆ, ಆ ಯುವ ಸಮೂಹಕ್ಕೆ ಮಾರ್ಗದರ್ಶನ ನೀಡಿದರೆ ಅದು ನಮ್ಮ ಹೊರೆ ಮತ್ತು ಭಯವನ್ನು ಕಡಿಮೆ ಗೊಳಿಸ ಬಹುದು ಎಂದವರು ಹೇಳಿದರು.

ವಕ್ಪ್ ನ ಆಸ್ತಿಯನ್ನು ಸಮುದಾಯದ ಶಿಕ್ಷಣಕ್ಕೆ ಹೆಚ್ಚು ಉಪಯೋಗಿಸುವಲ್ಲಿ ಚಿಂತನೆ ಮಾಡಿದ್ದೇನೆ. ರಾಜ್ಯದಾದ್ಯಂತ ಇರುವ ವಕ್ಪ್ ಆಸ್ತಿಯ ವಿವರ ಮತ್ತು ಅವಕಾಶವನ್ನು ಅಧ್ಯಯನ ಮಾಡುತ್ತಿದ್ದೇನೆ. ನಾವು ಮಾತು ಕಡಿಮೆ ದುಡಿಮೆ ಹೆಚ್ಚು ಮಾಡುವ ಉದ್ದೇಶ ಹೊಂದಿದ್ದೇವೆ. ಪ್ರತೀ ಜಿಲ್ಲೆಯಲ್ಲೂ ತಲಮಟ್ಟದಿಂದ ಕೆಲಸ ಕಾರ್ಯಗಳು ನಡೆಯ ಬೇಕು. ಕರೆಪ್ಟ್ ಆಗಿರುವ ಸಿಸ್ಟಮನ್ನು ಸರಿ ಪಡಿಸುವುದು ಮೊದಲ ಆಧ್ಯತೆ. ಬೀದರ್ ನಿಂದ ಚಾಮರಾಜನಗರದವರೆಗೆ ನಾವು ಸಮುದಾಯದ ಕಲ್ಯಾಣದ ಕನಸಿನೊಂದಿಗೆ ಇಚ್ಚಾಶಕ್ತಿಯಲ್ಲಿ ದುಡಿಯಬೇಕು. ನಮ್ಮಲ್ಲಿ ಸಮನ್ವಯತೆ ಮತ್ತು ಸಹಯೋಗ ಬೇಕು. ಸಹಕಾರ ಮತ್ತು ಸಮರ್ಪಣೆ ಬೇಕು. ಯಾವೊಂದು ಶಕ್ತಿಯೂ ನಮ್ಮನ್ನು ಬದಲಾಯಿಸುವುದಿಲ್ಲ, ನಮ್ಮಲ್ಲಿರುವ ಜ್ಞಾನ, ಸಮಯ, ಸಂಪತ್ತು ಮತ್ತು ಆರೋಗ್ಯ ಸರಿಯಾದ ಉದ್ದೇಶಕ್ಕೆ ಬಳಸಿದರೆ ಸಮುದಾಯದ ಇಂದಿನ ಸ್ಥಿತಿಯ ಚಿತ್ರಣ ಕೆಲವೇ ವರ್ಷದಲ್ಲಿ ಬದಲಾಯಿಸಲು ಸಾಧ್ಯವಿದೆ ಎಂದವರು ಹೇಳಿದರು.

ಕುರಾನ್ -ಹದೀಸ್ ಮತ್ತು ಇಸ್ಲಾಮಿ ಸಾಹಿತ್ಯದ ಅಧ್ಯಯನ ಮತ್ತು ಮಾರ್ಗದರ್ಶನದ ಸಮನ್ವಯ ಶಿಕ್ಷಣಕ್ಕೊಂದು ಆಧುನಿಕ ಪದ್ದತಿಯನ್ನು ಶಿಕ್ಷಣ ತಜ್ಞರು ಆಲೋಚಿಸಬೇಕು. ತಂತ್ರಜ್ಞಾನ ಮತ್ತು ಸಂಶೋಧನೆಯಲ್ಲಿ ಸಮುದಾಯದ ವಿದ್ಯಾರ್ಥಿಗಳು ತೊಡಗಿಸಲು ರಾಷ್ಟ್ರಕ್ಕೆ ಕೊಡುಗೆ ಕೊಡುವ ತಲೆಮಾರನ್ನು ರೂಪಿಸಲು ನಾವು ಜಗತ್ತನ್ನು ವೀಕ್ಷಿಸಬೇಕು. ದೇಶವ್ಯಾಪಿ ಅಲ್ಲದಿದ್ದರೂ ರಾಜ್ಯದಲ್ಲಾದರೂ ಸಮನ್ವಯ ಶಿಕ್ಷಣ ಪರಿಣಾಮಕಾರಿಯಾಗಿ ನೀಡುವ ಸಿಲೆಬಸ್ ಮತ್ತು ನೀತಿಯನ್ನು ನಾವು ಅಳವಡಿಸಬೇಕು. ಮಾದರಿ ಕ್ರಮವನ್ನು ಎಲ್ಲರೂ ಒಪ್ಪಿಕೊಳ್ಳುವ ಮತ್ತು ಅಳವಡಿಸುವ ಮನಸ್ಸು ಹೊಂದಬೇಕು. ಪ್ರತೀಯೊಬ್ಬರೂ ಒಂದೊಂದು ನೀತಿಯನ್ನು ಅಳವಡಿಸಿದರೆ ಅದು ಸಮುದಾಯದ ಸರ್ವಾಂಗೀಣ ಪ್ರಗತಿಯಲ್ಲಿ ಸಮಸ್ಯೆ ಮತ್ತು ಸವಾಲು ಸೃಷ್ಠಿಸುತ್ತದೆ, ಆಲೋಚನೆಗಳನ್ನು ಎಲ್ಲರೂ ಮಾಡಬಹುದು ಆದರೆ ಅದನ್ನು ರೂಪಿಸುವುದು ಅಷ್ಟು ಸುಲಭವಲ್ಲ. ಸಮುದಾಯದಲ್ಲಿ ತಜ್ಞರಿದ್ದಾರೆ, ಶ್ರೀಮಂತರಿದ್ದಾರೆ, ಜ್ಞಾನಿಗಳಿದ್ದಾರೆ, ಸಂಘ ಸಂಸ್ಥೆಗಳಲ್ಲಿ ಸಾವಿರಾರು ಕಾರ್ಯಕರ್ತರಿದ್ದಾರೆ. ವಕ್ಪ್ ಅಥವಾ ಇನ್ನಿತರ ಸಂಸ್ಥೆಗೆ ಸೇರಿದ ಮೂಲ ಸೌಲಭ್ಯಗಳಿದೆ. ಅದನ್ನು ಸಮುದಾಯದ ಪ್ರಗತಿಯ ಉದ್ದೇಶಕ್ಕೆ ಸಹಯೋಗದಲ್ಲಿ, ಒಂದೇ ಗುರಿಯಲ್ಲಿ ಮುನ್ನಡೆಸಿದರೆ ನಾವು ಯಶಸ್ಸನ್ನು ಸಾಧಿಸಲು ಸಾಧ್ಯವಿದೆ. ಹೊರತು ಇರುವ ಅವಕಾಶಗಳನ್ನು ಕೈ ಚೆಲ್ಲಿ ಮೈಮರೆತು ಬಿಟ್ಟರೆ ನಮ್ಮ ಸ್ಥಿತಿಯು ಬದಲಾಗದು ಎಂದು ಮೌಲಾನ ಶಾಫಿ ಸಹದಿಯವರು ಹೇಳಿದರು.